ਅੰਤਰਰਾਸ਼ਟਰੀ ਫ਼ਿਲਮ ਮਹੋਤਸਵ ਵਿੱਚ ਚੁਣੀ ਗਈ ਸ਼ਾਰਟ ਫ਼ਿਲਮ, ਮਨੀਸ਼ਾ ਨੇ ਚਮਕਾਇਆ ਨਾਮ
‘Gods Do Not Follow’ ਨੇ ਬਣਾਈ ਅੰਤਰਰਾਸ਼ਟਰੀ ਪਛਾਣ, ਵਿਦੇਸ਼ੀ ਮੀਡੀਆ ਨੇ ਕਹਾਣੀ, ਅਦਾਕਾਰੀ ਅਤੇ ਸਿਨੇਮਾਟੋਗ੍ਰਾਫੀ ਦੀ ਕੀਤੀ ਸ਼ਲਾਘਾ
ਇਸ਼ਾਨ ਪੇਹਲ ਦੇ ਨਿਰਦੇਸ਼ਨ ਹੇਠ ਬਣੀ ਸ਼ਾਰਟ ਫ਼ਿਲਮ ‘Gods Do Not Follow’ ਨੇ ਅੰਤਰਰਾਸ਼ਟਰੀ ਪੱਧਰ ’ਤੇ ਆਪਣੀ ਪਛਾਣ ਬਣਾਈ ਹੈ। ਫ਼ਿਲਮ ਦੀ ਚੋਣ ਅੰਤਰਰਾਸ਼ਟਰੀ ਫ਼ਿਲਮ ਮਹੋਤਸਵ ਲਈ ਹੋਈ ਹੈ। ਇਸ ਦੇ ਨਾਲ ਹੀ ਫ਼ਿਲਮ ਦੀ ਚਰਚਾ ਵਿਦੇਸ਼ੀ ਮੀਡੀਆ ਵਿੱਚ ਵੀ ਹੋਣ ਲੱਗੀ ਹੈ। The Daily Planet ਵਿੱਚ ਪ੍ਰਕਾਸ਼ਿਤ ਸਮੀਖਿਆ ਵਿੱਚ ਫ਼ਿਲਮ ਦੀ ਕਹਾਣੀ, ਕਲਾਕਾਰਾਂ ਦੀ ਅਦਾਕਾਰੀ ਅਤੇ ਖੂਬਸੂਰਤ ਸਿਨੇਮਾਟੋਗ੍ਰਾਫੀ ਦੀ ਵਿਸ਼ੇਸ਼ ਸ਼ਲਾਘਾ ਕੀਤੀ ਗਈ ਹੈ।
ਫ਼ਿਲਮ 16 ਸਾਲਾ ਉਮਾ ਦੀ ਕਹਾਣੀ ਹੈ, ਜੋ ਪਹਾੜਾਂ ਵਿੱਚ ਵੱਸਦੇ ਇੱਕ ਪਿੰਡ ਵਿੱਚ ਰਹਿੰਦੀ ਹੈ ਅਤੇ ਪਿਤਾ ਦੀ ਮੌਤ ਤੋਂ ਬਾਅਦ ਭਾਵਨਾਤਮਕ ਸੰਘਰਸ਼ ਵਿੱਚੋਂ ਲੰਘ ਰਹੀ ਹੈ। ਪਿੰਡ ਦਾ ਸਾਲਾਨਾ ਮੇਲਾ ਉਸ ਲਈ ਉਮੀਦ ਲੈ ਕੇ ਆਉਂਦਾ ਹੈ, ਪਰ ਮਾਹਵਾਰੀ ਦੇ ਕਾਰਨ ਉੱਥੋਂ ਦੀਆਂ ਸਮਾਜਿਕ ਪਰੰਪਰਾਵਾਂ ਉਸ ਨੂੰ ਮੇਲੇ ਵਿੱਚ ਜਾਣ ਤੋਂ ਰੋਕਦੀਆਂ ਹਨ। ਸਮੀਖਿਆ ਅਨੁਸਾਰ, ਫ਼ਿਲਮ ਇਸ ਛੋਟੀ ਜਿਹੀ ਪਾਬੰਦੀ ਰਾਹੀਂ ਪਰੰਪਰਾ, ਸਮਾਜਿਕ ਨਿਯਮਾਂ ਅਤੇ ਵਿਅਕਤੀ ਦੀ ਆਜ਼ਾਦੀ ਵਿਚਕਾਰਲੇ ਤਣਾਅ ਨੂੰ ਸਾਹਮਣੇ ਲਿਆਉਂਦੀ ਹੈ। ਉਮਾ ਦਾ ਵਿਰੋਧ ਕਿਸੇ ਵੱਡੇ ਵਿਦਰੋਹ ਦੇ ਰੂਪ ਵਿੱਚ ਨਹੀਂ, ਸਗੋਂ ਛੋਟੇ-ਛੋਟੇ ਫ਼ੈਸਲਿਆਂ ਰਾਹੀਂ ਸਾਹਮਣੇ ਆਉਂਦਾ ਹੈ। ਸਮੀਖਿਆ ਵਿੱਚ ਫ਼ਿਲਮ ਨੂੰ ਆਪਣੇ ਆਪ ਨੂੰ ਖੋਜਣ ਅਤੇ ਆਪਣੀ ਪਛਾਣ ਮੁੜ ਹਾਸਲ ਕਰਨ ਦੀ ਇੱਕ ਸੰਵੇਦਨਸ਼ੀਲ ਅਤੇ ਸਰਵਵਿਆਪੀ ਕਹਾਣੀ ਦੱਸਿਆ ਗਿਆ ਹੈ।
ਸਮੀਖਿਅਕ ਨੇ ਫ਼ਿਲਮ ਦੀ ਖੂਬਸੂਰਤ ਸਿਨੇਮਾਟੋਗ੍ਰਾਫੀ ਅਤੇ ਕਲਾਕਾਰਾਂ ਦੀ ਅਦਾਕਾਰੀ ਦੀ ਸ਼ਲਾਘਾ ਕਰਦਿਆਂ ਕਿਹਾ ਹੈ ਕਿ ਫ਼ਿਲਮ ਵਿੱਚ ਪਹਾੜ ਸਿਰਫ਼ ਪਿਛੋਕੜ ਨਹੀਂ ਹਨ, ਸਗੋਂ ਕਹਾਣੀ ਦੀ ਪਛਾਣ ਦਾ ਅਟੁੱਟ ਹਿੱਸਾ ਬਣ ਜਾਂਦੇ ਹਨ। ਨਿਰਦੇਸ਼ਕ ਇਸ਼ਾਨ ਪੇਹਲ ਦੇ ਨਿਰਦੇਸ਼ਨ ਦੀ ਵੀ ਸ਼ਲਾਘਾ ਕੀਤੀ ਗਈ ਹੈ। ਸਮੀਖਿਆ ਅਨੁਸਾਰ, ਫ਼ਿਲਮ ਆਪਣਾ ਸੰਦੇਸ਼ ਦਰਸ਼ਕਾਂ ’ਤੇ ਥੋਪਦੀ ਨਹੀਂ, ਸਗੋਂ ਉਨ੍ਹਾਂ ਨੂੰ ਉਮਾ ਦੀ ਦੁਨੀਆ ਵਿੱਚ ਲੈ ਜਾ ਕੇ ਖੁਦ ਸੋਚਣ ਦਾ ਮੌਕਾ ਦਿੰਦੀ ਹੈ।
17 ਸਾਲ ਦੀ ਉਮਰ ਵਿੱਚ ਸ਼ੁਰੂ ਹੋਇਆ ਮਨੀਸ਼ਾ ਦਾ ਫ਼ਿਲਮੀ ਸਫ਼ਰ
ਫ਼ਿਲਮ ਨਾਲ ਜੁੜੀ ਮਨੀਸ਼ਾ ਨੇ ਆਪਣੇ ਤਜਰਬੇ ਸਾਂਝੇ ਕਰਦਿਆਂ ਦੱਸਿਆ ਕਿ ਜਦੋਂ ਉਹ 17 ਸਾਲ ਦੀ ਸੀ ਤਾਂ ਇੱਕ ਜਾਣ-ਪਛਾਣ ਵਾਲੇ ਸਰ ਦੀ ਸਲਾਹ ’ਤੇ ਉਨ੍ਹਾਂ ਨੇ ਮਜ਼ਾਕ-ਮਜ਼ਾਕ ਵਿੱਚ ਕਾਸਟਿੰਗ ਲਈ ਆਪਣੀ ਪ੍ਰੋਫ਼ਾਈਲ ਭੇਜੀ ਸੀ। ਉਨ੍ਹਾਂ ਨੂੰ ਉਮੀਦ ਨਹੀਂ ਸੀ ਕਿ ਉਨ੍ਹਾਂ ਦੀ ਚੋਣ ਹੋ ਜਾਵੇਗੀ, ਪਰ ਕੁਝ ਸਮੇਂ ਬਾਅਦ ਉਨ੍ਹਾਂ ਨੂੰ 10 ਦਿਨਾਂ ਦੀ ਸ਼ੂਟਿੰਗ ਲਈ ਬੁਲਾਇਆ ਗਿਆ।
ਘਰ ਤੋਂ 10 ਦਿਨ ਦੂਰ ਰਹਿਣਾ ਉਨ੍ਹਾਂ ਲਈ ਚੁਣੌਤੀਪੂਰਨ ਸੀ। ਪਰਿਵਾਰ ਨੂੰ ਮਨਾਉਣ ਤੋਂ ਬਾਅਦ ਉਨ੍ਹਾਂ ਦਾ ਛੋਟਾ ਭਰਾ ਗਾਰਡੀਅਨ ਵਜੋਂ ਉਨ੍ਹਾਂ ਦੇ ਨਾਲ ਗਿਆ ਅਤੇ ਸੈੱਟ ’ਤੇ ਕਰੂ ਦੀ ਮਦਦ ਵੀ ਕਰਦਾ ਰਿਹਾ।
ਮਨੀਸ਼ਾ ਦੱਸਦੀ ਹੈ ਕਿ ਸ਼ੂਟਿੰਗ ਦੌਰਾਨ ਉਨ੍ਹਾਂ ਦੇ ਮਨ ਵਿੱਚ ਲਗਾਤਾਰ ਇਹ ਡਰ ਰਹਿੰਦਾ ਸੀ ਕਿ ਉਹ ਕੈਮਰੇ ਸਾਹਮਣੇ ਠੀਕ ਤਰੀਕੇ ਨਾਲ ਅਦਾਕਾਰੀ ਕਰ ਸਕੇਗੀ ਜਾਂ ਨਹੀਂ। ਲਗਾਤਾਰ ਸ਼ੂਟਿੰਗ, ਘਰ ਤੋਂ ਦੂਰੀ ਅਤੇ ਅਨਿਯਮਿਤ ਖਾਣ-ਪੀਣ ਕਾਰਨ ਉਨ੍ਹਾਂ ਨੂੰ ਸਿਹਤ ਸਬੰਧੀ ਪਰੇਸ਼ਾਨੀਆਂ ਦਾ ਵੀ ਸਾਹਮਣਾ ਕਰਨਾ ਪਿਆ। ਇਸ ਦੇ ਬਾਵਜੂਦ ਉਹ 10 ਦਿਨ ਉਨ੍ਹਾਂ ਲਈ ਜ਼ਿੰਦਗੀ ਬਦਲਣ ਵਾਲਾ ਤਜਰਬਾ ਸਾਬਤ ਹੋਏ। ਇਸ ਦੌਰਾਨ ਉਨ੍ਹਾਂ ਨੇ ਅਦਾਕਾਰੀ ਦੇ ਨਾਲ-ਨਾਲ ਜ਼ਿੰਦਗੀ ਵਿੱਚ ਆਤਮ-ਵਿਸ਼ਵਾਸ ਅਤੇ ਮਜ਼ਬੂਤੀ ਵੀ ਹਾਸਲ ਕੀਤੀ।
ਅੱਜ ਕੋਲਕਾਤਾ, ਚੰਡੀਗੜ੍ਹ ਅਤੇ ਹੋਰ ਥਾਵਾਂ ’ਤੇ ਫ਼ਿਲਮ ਦੀ ਸਕ੍ਰੀਨਿੰਗ ਅਤੇ ਅੰਤਰਰਾਸ਼ਟਰੀ ਪੱਧਰ ’ਤੇ ਮਿਲ ਰਹੀ ਪਛਾਣ ਨੂੰ ਦੇਖ ਕੇ ਮਨੀਸ਼ਾ ਆਪਣੇ ਸ਼ੁਰੂਆਤੀ ਤਜਰਬੇ ਨੂੰ ਯਾਦ ਕਰਦੀ ਹੈ। ਉਹ ਇਸ ਮੌਕੇ ਲਈ Chaar Chavanni Films ਦੀ ਧੰਨਵਾਦੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਟੀਮ ਨੇ ਉਨ੍ਹਾਂ ’ਤੇ ਵਿਸ਼ਵਾਸ ਕੀਤਾ ਅਤੇ ਇਸੇ ਵਿਸ਼ਵਾਸ ਨੇ ਉਨ੍ਹਾਂ ਦੇ ਇਸ ਸਫ਼ਰ ਨੂੰ ਇੱਕ ਯਾਦਗਾਰ ਤਜਰਬਾ ਬਣਾ ਦਿੱਤਾ।
