November 19, 2026

Justice News

ਅਵਾਮ ਦੀ ਆਵਾਜ਼

ਖਾਕੀ ਬਣੀ ਸਰਕਾਰ ਦਾ ‘ਕਮਾਊ ਪੁੱਤ’ ਤੇ ਪ੍ਰਾਈਵੇਟ ਟੋ ਵੈਨਾਂ ‘ਕਮਾਈ ਦਾ ATM’: ਅੰਮ੍ਰਿਤਸਰ ‘ਚ ਟ੍ਰੈਫਿਕ ਸੁਧਾਰ ਘੱਟ, ‘ਟਾਰਗੇਟ ਪੂਰਾ’ ਕਰਨ ਦੀ ਦੌੜ ਜ਼ਿਆਦਾ; ਬਿਨਾਂ ਕਾਗਜ਼ਾਂ-ਪੱਤਰਾਂ ਤੇ ਨਸ਼ੇੜੀ ਡਰਾਈਵਰਾਂ ਦੇ ਸਹਾਰੇ ਸੈਲਾਨੀਆਂ ਦੀਆਂ ਗੱਡੀਆਂ ‘ਤੇ ਗਿਰਝਾਂ ਵਾਂਗ ਝਪਟ ਰਹੇ ਨੇ ਠੇਕੇਦਾਰ ਦੇ ਕਰਿੰਦੇ

ਅੰਮ੍ਰਿਤਸਰ

(ਰਣਜੀਤ ਸਿੰਘ ਮਸੌਣ)

ਗੁਰੂ ਨਗਰੀ ਅੰਮ੍ਰਿਤਸਰ ਦੀਆਂ ਸੜਕਾਂ ‘ਤੇ ਇਨ੍ਹੀਂ ਦਿਨੀਂ ਟ੍ਰੈਫਿਕ ਵਿਵਸਥਾ ਸੁਧਾਰਨ ਨਾਲੋਂ ਵੱਧ ਸਰਕਾਰੀ ਖ਼ਜ਼ਾਨਾ ਅਤੇ ਠੇਕੇਦਾਰਾਂ ਦੀਆਂ ਜੇਬਾਂ ਭਰਨ ਦੀ ‘ਮੈਰਾਥਨ’ ਚੱਲ ਰਹੀ ਹੈ। ਹਾਲਾਤ ਇਹ ਹਨ ਕਿ ਟ੍ਰੈਫਿਕ ਪੁਲਿਸ ਦੇ ਮੁਲਾਜ਼ਮ ਹੁਣ ਆਵਾਜਾਈ ਕੰਟਰੋਲ ਕਰਨ ਵਾਲੇ ਸੇਵਕ ਘੱਟ ਅਤੇ ਸਰਕਾਰ ਦੇ ‘ਕਮਾਊ ਪੁੱਤ’ ਜ਼ਿਆਦਾ ਬਣ ਗਏ ਹਨ। ਦੂਜੇ ਪਾਸੇ, ਕਮਿਸ਼ਨਰ ਪੁਲਿਸ ਅੰਮ੍ਰਿਤਸਰ ਦੀ ਛਤਰ-ਛਾਇਆ ਹੇਠ ਸੜਕਾਂ ‘ਤੇ ਦਨਦਨਾਉਂਦੀਆਂ ਫਿਰ ਰਹੀਆਂ ਪ੍ਰਾਈਵੇਟ ‘ਟੋ ਵੈਨਾਂ’ (Tow Vans) ਲੋਕਾਂ ਦੀ ਸਹੂਲਤ ਘੱਟ ਅਤੇ ਖਾਕੀ ਤੇ ਠੇਕੇਦਾਰਾਂ ਦੀ ‘ਕਮਾਈ ਦਾ ਏ.ਟੀ.ਐਮ.’ (ATM) ਜ਼ਿਆਦਾ ਬਣਦੀਆਂ ਜਾ ਰਹੀਆਂ ਹਨ।

ਸਭ ਤੋਂ ਵੱਡਾ ਵਿਅੰਗ ਤਾਂ ਇਹ ਹੈ ਕਿ ਜਿਹੜੀ ਟ੍ਰੈਫਿਕ ਪੁਲਿਸ ਆਮ ਆਦਮੀ ਦੀ ਗੱਡੀ ਦਾ ‘ਪਲਿਊਸ਼ਨ’ (Pollution) ਜਾਂ ‘ਇੰਸ਼ੋਰੈਂਸ’ (Insurance) ਖ਼ਤਮ ਹੋਣ ‘ਤੇ ਹਜ਼ਾਰਾਂ ਰੁਪਏ ਦਾ ਆਨਲਾਈਨ ਚਲਾਨ ਠੋਕਣ ਲੱਗਿਆਂ ਇੱਕ ਸਕਿੰਟ ਨਹੀਂ ਲਾਉਂਦੀ, ਉਸੇ ਪੁਲਿਸ ਦੇ ਨੱਕ ਹੇਠ ਚੱਲ ਰਹੀਆਂ ਇਨ੍ਹਾਂ ਪ੍ਰਾਈਵੇਟ ਟੋ ਵੈਨਾਂ ਦੇ ਆਪਣੇ ਕਾਗਜ਼-ਪੱਤਰ ਰੱਬ ਆਸਰੇ ਚੱਲ ਰਹੇ ਹਨ। ਇਸ ਪੂਰੇ ਸਿਸਟਮ ਨੂੰ ਦੇਖ ਕੇ ਇਹੀ ਕਹਾਵਤ ਸੱਚ ਹੁੰਦੀ ਜਾਪਦੀ ਹੈ ਕਿ “ਅੰਨ੍ਹਾ ਵੰਡੇ ਰਿਓੜੀਆਂ, ਮੁੜ-ਮੁੜ ਆਪਣਿਆਂ ਨੂੰ ਦੇਵੇ” ਜਾਂ ਫਿਰ “ਚਿਰਾਗ਼ ਤਲੇ ਹਨੇਰਾ”। ਇਸ ਪੂਰੇ ਮਾਮਲੇ ‘ਤੇ ਟ੍ਰੈਫਿਕ ਪੁਲਿਸ ਅਤੇ ਠੇਕੇਦਾਰਾਂ ਦੀ ਕਾਰਗੁਜ਼ਾਰੀ ਨੂੰ ਆੜੇ ਹੱਥੀਂ ਲੈਂਦਿਆਂ ਸ਼੍ਰੋਮਣੀ ਅਕਾਲੀ ਦਲ ਦੇ ਜ਼ਿਲ੍ਹਾ ਅੰਮ੍ਰਿਤਸਰ ਦਿਹਾਤੀ ਪ੍ਰਧਾਨ ਰਾਜਵਿੰਦਰ ਸਿੰਘ ਰਾਜਾ ਲਦੇਹ ਨੇ ਪ੍ਰਸ਼ਾਸਨ ਦੀ ਪੋਲ ਖੋਲ੍ਹ ਕੇ ਰੱਖ ਦਿੱਤੀ ਹੈ।

ਰੋਜ਼ਾਨਾ ‘ਚਲਾਨ ਕੋਟੇ’ ਨੇ ਪੁਲਿਸ ਮੁਲਾਜ਼ਮਾਂ ਨੂੰ ਵੀ ਪਾਇਆ ਵਖ਼ਤ

ਸਵੇਰ ਤੋਂ ਸ਼ਾਮ ਤੱਕ ਸੜਕਾਂ ‘ਤੇ ਖੜ੍ਹੇ ਟ੍ਰੈਫਿਕ ਮੁਲਾਜ਼ਮਾਂ ਦਾ ਪੂਰਾ ਧਿਆਨ ਜਾਮ ਖੁਲ੍ਹਵਾਉਣ ਦੀ ਬਜਾਏ ਹੱਥਾਂ ਵਿੱਚ ਫੜੀਆਂ ਆਨਲਾਈਨ ਚਲਾਨ ਮਸ਼ੀਨਾਂ ‘ਤੇ ਟਿਕਿਆ ਰਹਿੰਦਾ ਹੈ। ਲੋਕਾਂ ਨੂੰ ਭਿਣਕ ਤੱਕ ਨਹੀਂ ਲੱਗਦੀ, ਲੁਕ-ਛਿਪ ਕੇ ਫੋਟੋਆਂ ਖਿੱਚੀਆਂ ਜਾਂਦੀਆਂ ਹਨ ਅਤੇ ਘਰ ਬੈਠਿਆਂ ਹੀ ਮੋਬਾਈਲਾਂ ‘ਤੇ ਚਲਾਨਾਂ ਦੇ ਮੈਸੇਜ ਖੜਕ ਜਾਂਦੇ ਹਨ। ਸੂਤਰਾਂ ਮੁਤਾਬਕ, ਮੁਲਾਜ਼ਮਾਂ ਨੂੰ ਉੱਪਰੋਂ ਰੋਜ਼ਾਨਾ ਚਲਾਨ ਕੱਟਣ ਦਾ ਇੱਕ ਖ਼ਾਸ ‘ਅੰਕੜਾ’ (Target) ਦਿੱਤਾ ਹੋਇਆ ਹੈ। ਆਪਣੀ ਨੌਕਰੀ ਬਚਾਉਣ ਅਤੇ ਅਫ਼ਸਰਾਂ ਦੀ ਗੁੱਡ-ਬੁੱਕ ਵਿੱਚ ਰਹਿਣ ਲਈ ਮੁਲਾਜ਼ਮ ਸਾਰਾ ਦਿਨ ‘ਸ਼ਿਕਾਰ’ ਦੀ ਤਾਕ ਵਿੱਚ ਰਹਿੰਦੇ ਹਨ। ਦਿਲਚਸਪ ਗੱਲ ਇਹ ਹੈ ਕਿ ਇਸ ‘ਟਾਰਗੇਟ ਸਿਸਟਮ’ ਕਾਰਨ ਖੁਦ ਟ੍ਰੈਫਿਕ ਪੁਲਿਸ ਮੁਲਾਜ਼ਮ ਵੀ ਮਾਨਸਿਕ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰ ਰਹੇ ਹਨ, ਕਿਉਂਕਿ ਉਨ੍ਹਾਂ ‘ਤੇ ਟ੍ਰੈਫਿਕ ਚਲਾਉਣ ਨਾਲੋਂ ਵੱਧ ‘ਕਮਾਈ ਕਰਕੇ ਦਿਖਾਉਣ’ ਦਾ ਦਬਾਅ ਹੈ।

ਸ੍ਰੀ ਦਰਬਾਰ ਸਾਹਿਬ ਦੇ ਸ਼ਰਧਾਲੂਆਂ ਤੇ ਸੈਲਾਨੀਆਂ ਲਈ ‘ਜੀਅ ਦਾ ਜੰਜਾਲ’ ਬਣੀ ਖਾਕੀ

ਰਾਜਾ ਲਦੇਹ ਨੇ ਤਿੱਖੇ ਤੇਵਰ ਦਿਖਾਉਂਦਿਆਂ ਕਿਹਾ ਕਿ ਟ੍ਰੈਫਿਕ ਪੁਲਿਸ ਦਾ ਅਸਲ ਕੰਮ ਆਵਾਜਾਈ ਨੂੰ ਸੁਚਾਰੂ ਢੰਗ ਨਾਲ ਚਲਾਉਣਾ ਹੈ, ਪਰ ਇੱਥੇ ਮੁਲਾਜ਼ਮਾਂ ਅਤੇ ਠੇਕੇਦਾਰ ਦੀ ‘ਬਾਜ਼ ਵਰਗੀ ਅੱਖ’ ਬਾਹਰੋਂ ਆਏ ਸੈਲਾਨੀਆਂ ਦੀਆਂ ਗੱਡੀਆਂ ‘ਤੇ ਟਿਕੀ ਰਹਿੰਦੀ ਹੈ। ਜਿਵੇਂ ਹੀ ਕੋਈ ਸ਼ਰਧਾਲੂ ਜਾਂ ਸੈਲਾਨੀ ਬਾਹਰਲੇ ਸੂਬੇ ਜਾਂ ਸ਼ਹਿਰ ਤੋਂ ਗੁਰੂ ਨਗਰੀ ਮੱਥਾ ਟੇਕਣ ਆਉਂਦਾ ਹੈ ਅਤੇ ਗੱਡੀ ਖੜ੍ਹੀ ਕਰਦਾ ਹੈ, ਇਹ ਟੋ ਵੈਨਾਂ ਗਿਰਝਾਂ ਵਾਂਗ ਝਪਟ ਕੇ ਗੱਡੀ ਚੁੱਕ ਕੇ ਲੈ ਜਾਂਦੀਆਂ ਹਨ। ਇੰਨਾ ਹੀ ਨਹੀਂ, ਸੱਚਖੰਡ ਸ੍ਰੀ ਹਰਿਮੰਦਰ ਸਾਹਿਬ ਤੋਂ ਮੱਥਾ ਟੇਕ ਕੇ ਬਾਹਰ ਨਿਕਲਦਿਆਂ ਸਾਰ ਹੀ ਰਾਮ ਤਲਾਈ ਚੌਕ (ਤੰਦੂਰਾਂ ਵਾਲਾ ਚੌਕ) ਵਿੱਚ ਟ੍ਰੈਫਿਕ ਪੁਲਿਸ ਮੁਲਾਜ਼ਮਾਂ ਵੱਲੋਂ ਬਾਹਰੋਂ ਆਏ ਯਾਤਰੂਆਂ ਦੀਆਂ ਗੱਡੀਆਂ ਨੂੰ ਘੇਰ ਕੇ ਚਲਾਨ ਦੇ ਨਾਂ ਉੱਪਰ ਵੱਡੇ ਪੱਧਰ ‘ਤੇ ਪ੍ਰੇਸ਼ਾਨ ਕੀਤਾ ਜਾ ਰਿਹਾ ਹੈ। ਗੁਰੂ ਨਗਰੀ ਆਉਣ ਵਾਲੇ ਮਹਿਮਾਨਾਂ ਨੂੰ ਸਹੂਲਤ ਦੇਣ ਦੀ ਬਜਾਏ ਖੱਜਲ-ਖੁਆਰੀ ਦਾ ਤੋਹਫ਼ਾ ਦਿੱਤਾ ਜਾ ਰਿਹਾ ਹੈ।

ਆਪ ਕਾਨੂੰਨ ਤੋਂ ਬਾਹਰ ਨੇ ਇਹ ‘ਕਾਨੂੰਨ ਦੀਆਂ ਰੱਖਵਾਲੀਆਂ’ ਵੈਨਾਂ: ਕਿੱਥੇ ਨੇ ਕਾਗਜ਼-ਪੱਤਰ?

ਜਦੋਂ ਆਮ ਨਾਗਰਿਕ ਸੜਕ ‘ਤੇ ਨਿਕਲਦਾ ਹੈ ਤਾਂ ਪੁਲਿਸ ਉਸ ਦੇ ਕਾਗਜ਼ਾਂ ਦੀ ਪੂਰੀ ਪੜਤਾਲ ਕਰਦੀ ਹੈ, ਪਰ ਸਵਾਲ ਇਹ ਉੱਠਦਾ ਹੈ ਕਿ ਕੀ ਪ੍ਰਸ਼ਾਸਨ ਨੇ ਕਦੇ ਇਨ੍ਹਾਂ ਪ੍ਰਾਈਵੇਟ ਟੋ ਵੈਨਾਂ ਦੇ ਜ਼ਰੂਰੀ ਦਸਤਾਵੇਜ਼ਾਂ ਦੀ ਆਨਲਾਈਨ ਜਾਂਚ ਕੀਤੀ ਹੈ? ਕਾਨੂੰਨੀ ਨਿਯਮਾਂ ਮੁਤਾਬਕ ਸੜਕ ‘ਤੇ ਚੱਲਣ ਵਾਲੀ ਹਰ ਕਮਰਸ਼ੀਅਲ ਟੋ ਵੈਨ ਕੋਲ ਹੇਠ ਲਿਖੇ ਦਸਤਾਵੇਜ਼ ਹੋਣੇ ਲਾਜ਼ਮੀ ਹਨ, ਜਿਨ੍ਹਾਂ ‘ਤੇ ਵੱਡੇ ਸਵਾਲੀਆ ਨਿਸ਼ਾਨ ਲੱਗੇ ਹੋਏ ਹਨ:

  • ਬਿਨਾਂ ਹਾਈ-ਸਕਿਓਰਿਟੀ ਨੰਬਰ ਪਲੇਟਾਂ (HSRP): ਆਮ ਨਾਗਰਿਕ ਦੀ ਗੱਡੀ ‘ਤੇ ਜੇਕਰ ਨੰਬਰ ਪਲੇਟ ਸਹੀ ਨਾ ਹੋਵੇ ਤਾਂ ਮਸ਼ੀਨ ਤੁਰੰਤ ਚਲਾਨ ਕੱਟ ਦਿੰਦੀ ਹੈ, ਪਰ ਇਨ੍ਹਾਂ ਪ੍ਰਾਈਵੇਟ ਟੋ ਵੈਨਾਂ ‘ਤੇ ਖੁਦ ਹੀ ਹਾਈ-ਸਕਿਓਰਿਟੀ ਨੰਬਰ ਪਲੇਟਾਂ ਗਾਇਬ ਹਨ ਅਤੇ ਬਾਹਰਲੇ ਰਾਜਾਂ (ਜਿਵੇਂ ਹਿਮਾਚਲ ਪ੍ਰਦੇਸ਼ ਆਦਿ) ਦੇ ਨੰਬਰਾਂ ਵਾਲੀਆਂ ਗੱਡੀਆਂ ਬਿਨਾਂ ਰੋਕ-ਟੋਕ ਘੁੰਮ ਰਹੀਆਂ ਹਨ।

  • ਆਨਲਾਈਨ ਇੰਸ਼ੋਰੈਂਸ, ਪਲਿਊਸ਼ਨ (PUC) ਤੇ ਫਿਟਨੈੱਸ ਪਾਸਿੰਗ: ਨਿਯਮਾਂ ਅਨੁਸਾਰ ਹਰ ਟੋ ਵੈਨ ਦੀ ਵੈਧ ਕਮਰਸ਼ੀਅਲ ਇੰਸ਼ੋਰੈਂਸ, ਪਲਿਊਸ਼ਨ ਸਰਟੀਫਿਕੇਟ (PUC), ਆਰ.ਟੀ.ਓ. ਵੱਲੋਂ ਜਾਰੀ ਫਿਟਨੈੱਸ ਪਾਸਿੰਗ ਸਰਟੀਫਿਕੇਟ, ਅਤੇ ਕਮਰਸ਼ੀਅਲ ਪਰਮਿਟ ਆਨਲਾਈਨ ਪੋਰਟਲ (Vahan) ‘ਤੇ ਅਪਡੇਟ ਹੋਣਾ ਜ਼ਰੂਰੀ ਹੈ। ਇਲਜ਼ਾਮ ਹਨ ਕਿ ਕਈ ਵੈਨਾਂ ਦੇ ਕਾਗਜ਼-ਪੱਤਰ ਪੂਰੇ ਨਾ ਹੋਣ ਦੇ ਬਾਵਜੂਦ ਪੁਲਿਸ ਦੀ ਮਿਲੀਭੁਗਤ ਨਾਲ ਇਹ ਸੜਕਾਂ ‘ਤੇ ਦੌੜ ਰਹੀਆਂ ਹਨ। ਕੀ ਟ੍ਰੈਫਿਕ ਪੁਲਿਸ ਕਦੇ ਇਨ੍ਹਾਂ ਵੈਨਾਂ ਦੇ ਨੰਬਰ ਆਪਣੀ ਚਲਾਨ ਮਸ਼ੀਨ ਵਿੱਚ ਪਾ ਕੇ ਚੈੱਕ ਕਰਨ ਦੀ ਹਿੰਮਤ ਦਿਖਾਏਗੀ?

  • ਸਸਤੇ ਡਰਾਈਵਰ ਅਤੇ ਹੈਵੀ ਲਾਇਸੈਂਸ ਦੀ ਘਾਟ: ਠੇਕੇਦਾਰਾਂ ਵੱਲੋਂ ਆਪਣਾ ਮੁਨਾਫ਼ਾ ਵਧਾਉਣ ਲਈ ਸਸਤੇ ਡਰਾਈਵਰ ਅਤੇ ਹੈਲਪਰ ਰੱਖੇ ਗਏ ਹਨ। ਨਿਯਮਾਂ ਮੁਤਾਬਕ ਟੋ ਵੈਨ ਚਲਾਉਣ ਵਾਲੇ ਕੋਲ ‘ਹੈਵੀ ਟ੍ਰਾਂਸਪੋਰਟ ਵਹੀਕਲ’ (HTV) ਡਰਾਈਵਿੰਗ ਲਾਇਸੈਂਸ ਅਤੇ ਕਰੇਨ ਆਪਰੇਟ ਕਰਨ ਦਾ ਤਜਰਬਾ ਹੋਣਾ ਲਾਜ਼ਮੀ ਹੈ, ਪਰ ਬਿਨਾਂ ਜਾਂਚ-ਪੜਤਾਲ ਤੋਂ ਹੀ ਇਨ੍ਹਾਂ ਨੂੰ ਲੋਕਾਂ ਦੀਆਂ ਲੱਖਾਂ ਰੁਪਏ ਦੀਆਂ ਗੱਡੀਆਂ ਖਿੱਚਣ ਲਈ ਛੱਡਿਆ ਹੋਇਆ ਹੈ।

  • ਡੋਪ ਟੈਸਟ ਦੀ ਮੰਗ: ਰਾਜਾ ਲਦੇਹ ਨੇ ਗੰਭੀਰ ਇਲਜ਼ਾਮ ਲਾਉਂਦਿਆਂ ਕਿਹਾ ਕਿ ਇਨ੍ਹਾਂ ਵੈਨਾਂ ਦੇ ਕਈ ਡਰਾਈਵਰ ਨਸ਼ੇ ਦੇ ਆਦੀ ਹਨ, ਜੋ ਸੜਕਾਂ ‘ਤੇ ਚੱਲਦੇ ਲੋਕਾਂ ਦੀ ਜਾਨ-ਮਾਲ ਲਈ ਸਿੱਧਾ ਖ਼ਤਰਾ ਹਨ। ਇਨ੍ਹਾਂ ਸਾਰਿਆਂ ਦਾ ਤੁਰੰਤ ਡੋਪ ਟੈਸਟ ਕਰਵਾਇਆ ਜਾਣਾ ਚਾਹੀਦਾ ਹੈ।

ਜੁਰਮਾਨੇ ਦੀਆਂ ਪਰਚੀਆਂ ਵਿੱਚ ‘ਗੋਲਮਾਲ’ ਦਾ ਖੇਡ

ਮਾਮਲਾ ਸਿਰਫ਼ ਗੱਡੀਆਂ ਚੁੱਕਣ ਜਾਂ ਆਨਲਾਈਨ ਚਲਾਨ ਕੱਟਣ ਤੱਕ ਹੀ ਸੀਮਤ ਨਹੀਂ ਹੈ। ਇਲਜ਼ਾਮ ਇਹ ਵੀ ਹਨ ਕਿ ਟ੍ਰੈਫਿਕ ਪੁਲਿਸ ਮੁਲਾਜ਼ਮਾਂ ਵੱਲੋਂ ਚੁੱਕ ਕੇ ਲਿਆਂਦੀਆਂ ਗਈਆਂ ਗੱਡੀਆਂ ਦੀਆਂ ਜੁਰਮਾਨਾ ਪਰਚੀਆਂ ਵਿੱਚ ਵੀ ਵੱਡੇ ਪੱਧਰ ‘ਤੇ ਗੋਲਮਾਲ ਕੀਤਾ ਜਾਂਦਾ ਹੈ। ਠੇਕੇਦਾਰ ਅਤੇ ਮੁਲਾਜ਼ਮਾਂ ਦੀ ਇਸ ਮਿਲੀਭੁਗਤ ਕਾਰਨ ਟ੍ਰੈਫਿਕ ਸੁਧਾਰ ਦੀ ਇਹ ਮੁਹਿੰਮ ਪੂਰੀ ਤਰ੍ਹਾਂ ‘ਵਸੂਲੀ ਮੁਹਿੰਮ’ ਵਿੱਚ ਤਬਦੀਲ ਹੁੰਦੀ ਨਜ਼ਰ ਆ ਰਹੀ ਹੈ।

ਪ੍ਰਸ਼ਾਸਨ ਨੂੰ ਖਰੀ-ਖਰੀ ਨਸੀਹਤ: ‘ਟੋ’ ਕਰਨਾ ਛੱਡੋ, ਟ੍ਰੈਫਿਕ ਸੰਭਾਲੋ

ਅੰਤ ਵਿੱਚ ਰਾਜਾ ਲਦੇਹ ਨੇ ਪੁਲਿਸ ਪ੍ਰਸ਼ਾਸਨ ਨੂੰ ਚਿਤਾਵਨੀ ਭਰੇ ਲਹਿਜੇ ਵਿੱਚ ਕਿਹਾ ਕਿ ਅੰਮ੍ਰਿਤਸਰ ਇੱਕ ਵਿਸ਼ਵ ਪ੍ਰਸਿੱਧ ਧਾਰਮਿਕ ਅਤੇ ਸੈਰ-ਸਪਾਟਾ ਕੇਂਦਰ ਹੈ। ਇੱਥੇ ਸਥਾਨਕ ਵਾਹਨਾਂ ਦੇ ਨਾਲ-ਨਾਲ ਰੋਜ਼ਾਨਾ ਹਜ਼ਾਰਾਂ ਸੈਲਾਨੀ ਆਪਣੀਆਂ ਗੱਡੀਆਂ ਲੈ ਕੇ ਆਉਂਦੇ ਹਨ। ਪੁਲਿਸ ਨੂੰ ਚਾਹੀਦਾ ਹੈ ਕਿ ਉਹ ਮੁਲਾਜ਼ਮਾਂ ਨੂੰ ‘ਕਮਾਊ ਪੁੱਤ’ ਨਾ ਬਣਾਉਣ ਅਤੇ ਗੱਡੀਆਂ ਚੁੱਕਣ ਦੇ ‘ਸ਼ਾਰਟਕੱਟ’ ਰਾਹੀਂ ਕਮਾਈ ਕਰਨ ਦਾ ਧੰਦਾ ਬੰਦ ਕਰਕੇ ਪਾਰਕਿੰਗ ਦੇ ਢੁਕਵੇਂ ਪ੍ਰਬੰਧ ਕਰੇ। ਨਾਲ ਹੀ ਇਨ੍ਹਾਂ ਪ੍ਰਾਈਵੇਟ ਟੋ ਵੈਨਾਂ ਦੇ ਸਾਰੇ ਦਸਤਾਵੇਜ਼ਾਂ (ਇੰਸ਼ੋਰੈਂਸ, ਪਲਿਊਸ਼ਨ, ਪਾਸਿੰਗ, ਪਰਮਿਟ) ਅਤੇ ਡਰਾਈਵਰਾਂ ਦੇ ਹੈਵੀ ਲਾਇਸੈਂਸਾਂ ਦੀ ਜਨਤਕ ਤੌਰ ‘ਤੇ ਜਾਂਚ ਕੀਤੀ ਜਾਵੇ, ਤਾਂ ਜੋ ਗੁਰੂ ਨਗਰੀ ਆਉਣ ਵਾਲੇ ਲੋਕ ਚੰਗੀਆਂ ਯਾਦਾਂ ਲੈ ਕੇ ਜਾਣ, ਨਾ ਕਿ ਚਲਾਨਾਂ ਦੀਆਂ ਪਰਚੀਆਂ।

Leave a Reply

Your email address will not be published. Required fields are marked *

You may have missed

Copyright © All rights reserved. | Newsphere by AF themes.