ਰਣਜੀਤ ਸਿੰਘ ਮਸੌਣ
ਅੰਮ੍ਰਿਤਸਰ///////ਅੱਜ ਹਲਕਾ ਵਿਧਾਇਕ ਤੇ ਸਾਬਕਾ ਕੈਬਨਿਟ ਮੰਤਰੀ ਪੰਜਾਬ ਕੁਲਦੀਪ ਸਿੰਘ ਧਾਲੀਵਾਲ ਵੱਲੋਂ ਵਿਸ਼ਵ ਪੰਜਾਬੀ ਸਭਾ ਕੈਨੇਡਾ ਦੇ ਸਹਿਯੋਗ ਨਾਲ ਹੜ੍ਹ ਪ੍ਰਭਾਵਿਤ ਲੱਖੂਵਾਲ ਨੇੜੇ ਰਮਦਾਸ, ਕੋਟ ਗੁਰਬਖਸ਼ ਤੇ ਸੰਮੋਵਾਲ ਪਿੰਡਾਂ ‘ਚ 200 ਹੜ੍ਹ ਪੀੜਤਾਂ ਦੇ ਘਰਾਂ ‘ਚ ਮੁੜ ਵਸੇਬੇ ਦੇ ਮੱਦੇਨਜ਼ਰ ਫੋਲਡਿੰਗ ਮੰਜ਼ੇ ਤੇ ਕੰਬਲ ਵੰਡੇ ਗਏ ਅਤੇ ਦੱਸਿਆਂ ਕਿ ਵਿਸ਼ਵ ਪੰਜਾਬੀ ਕੈਨੇਡਾ ਦੇ ਚੇਅਰਮੈਨ ਡਾ. ਦਲਬੀਰ ਸਿੰਘ ਕਥੂਰੀਆ ਵੱਲੋਂ ਹੜ੍ਹ ਪੀੜਤਾਂ ਦੇ ਮੁੜ ਵਸੇਬੇ ਲਈ 15 ਲੱਖ ਰੁਪਏ ਰਾਸ਼ੀ ਰਾਖਵੀਂ ਰੱਖੀ ਗਈ ਹੈ, ਜਿਸ ‘ਚੋਂ ਪਹਿਲੇ ਪੜਾਅ ‘ਚ ਲੋੜਵੰਦ ਹੜ੍ਹ ਪੀੜਤਾਂ ‘ਚ 1000 ਫੋਲਡਿੰਗ ਮੰਜ਼ੇ ਤੇ 1000 ਕੰਬਲ ਵੰਡੇ ਜਾਣਗੇ।
ਜਦੋਂਕਿ ਅਗਲੇ ਪੜਾਅ ‘ਚ ਹੜ੍ਹ ਪੀੜਤਾਂ ਨੂੰ ਮੁੜ ਵਸੇਬੇ ਲਈ ਜ਼ਰੂਰੀ ਲੋੜੀਂਦੀਆਂ ਹੋਰ ਘਰੇਲੂ ਵਸਤਾਂ ਭੇਂਟ ਕੀਤੀਆਂ ਜਾਣਗੀਆਂ। ਉਪਰੰਤ ਚੋਣਵੇਂ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸ. ਧਾਲੀਵਾਲ ਨੇ ਕਿਹਾ ਕਿ ਕੇਂਦਰੀ ਮੋਦੀ ਸਰਕਾਰ ਨੂੰ ਪੰਜਾਬ ਦੇ ਪੁਨਰ ਵਸੇਬੇ ਅਤੇ ਭਵਿੱਖ ਵਿੱਚ ਹੜ੍ਹਾਂ ਦੀ ਸਥਾਈ ਰੋਕਥਾਮ ਵੱਜੋਂ ਸੰਘਵਾਦ ਤਹਿਤ ਪੰਜਾਬ ਨੂੰ ਆਪ ਮੁਹਾਰਾ ਵਿੱਤੀ ਸਹਿਯੋਗ ਦੇਣ ਦੀ ਬਜ਼ਾਏ ਦਿੱਲੀ ਤੋਂ ਕੇਂਦਰੀ ਵਜ਼ੀਰਾਂ ਦੀਆਂ ਭੇਜੀਆਂ ਜਾ ਰਹੀਆਂ ਟੀਮਾਂ ਰਾਹੀਂ ਬੇਥਵੇ ਝੂਠੇ ਨਿਰਾਧਾਰ ਤੇ ਬੇਬੁਨਿਆਦ ਦੋਸ਼ਾਂ ਦੇ ਕਟਹਿਰੇ ਵਿੱਚ ਖੜਾ ਕਰਨ ਦੀਆਂ ਸਾਜਿਸ਼ਾਂ ਨੂੰ ਫੌਰੀ ਤੌਰ ਤੇ ਬੰਦ ਕਰ ਦਿੱਤਾ ਜਾਣਾ ਚਾਹੀਦਾ ਹੈ। ਉਹਨਾਂ ਨੇ ਕੇਂਦਰੀ ਮੋਦੀ ਸਰਕਾਰ ਤੇ ਜ਼ੋਰ ਦਿੱਤਾ ਕਿ ਬੇਲੋੜੇ ਦੋਸ਼ਾਂ ਦੀ ਝੜੀ ਲਗਾਉਣ ਦੀ ਬਜ਼ਾਏ ਕੇਂਦਰ ਸਰਕਾਰ ਬਿਨ੍ਹਾਂ ਕਿਸੇ ਦੇਰੀ ਤੋਂ ਕਿਸਾਨਾਂ ਦੀਆਂ ਨੁਕਸਾਨੀਆਂ ਫ਼ਸਲਾਂ ਦੇ ਮੁਆਵਜ਼ੇ, ਬਰਬਾਦ ਹੋਈਆਂ ਸੜਕਾਂ, ਖੇਤਾਂ ਨੂੰ ਦੁਬਾਰਾ ਵਾਹੀਯੋਗ ਬਣਾਉਣ, ਸਕੂਲਾਂ ਕਾਲਜਾਂ, ਸਿਹਤ ਸੰਸਥਾਵਾਂ ਸਮੇਤ ਵਿਦਿਆਰਥੀਆਂ ਦੀ ਮੁੜ ਪੜਾਈ ਲਈ ਬਿਨ੍ਹਾਂ ਕਿਸੇ ਦੇਰੀ ਰਾਜਸੀ ਨੌਟੰਕੀ ਛੱਡ ਕੇ ਪੁਨਰਵਾਸ ਲਈ 20 ਹਜ਼ਾਰ ਕਰੋੜ ਦਾ ਰਾਹਤ ਪੈਕੇਜ਼ ਜਾਰੀ ਕਰਨ ਲਈ ਪਹਿਲ ਕਦਮੀ ਕਰੇ। ਦਰਿਆਵਾਂ ਦੀ ਸਾਫ਼ ਸਫ਼ਾਈ ਅਤੇ ਧੁੱਸੀ ਬੰਨ੍ਹਾਂ ਦੀ ਮਜ਼ਬੂਤੀ ਲਈ ਦੂਰ ਦ੍ਰਿਸ਼ਟੀ ਅਪਣਾਉਂਦਿਆਂ ਵੱਡੇ ਪੱਧਰ ਤੇ ਫੰਡ ਜਾਰੀ ਕੀਤੇ ਜਾਣ ਤਾਂ ਜੋ ਭਵਿੱਖ ਵਿੱਚ ਪੰਜਾਬ ਨੂੰ ਇਸ ਵੇਰਾਂ ਵਰਗੇ ਭਿਅੰਕਰ ਹੜਾਂ ਦਾ ਸਾਹਮਣਾ ਨਾ ਕਰਨਾ ਪਵੇ। ਸ. ਧਾਲੀਵਾਲ ਨੇ ਇਹ ਵੀ ਪ੍ਰਗਟਾਵਾ ਕੀਤਾ ਕਿ ਐਸਡੀਆਰਐਫ ਦੇ ਨਿਯਮ ਹੱਦੋਂ ਵੱਧ ਸਖ਼ਤ ਪਾਬੰਦੀਆਂ ਵਾਲੇ ਹੋਣ ਦੇ ਮੱਦੇਨਜ਼ਰ ਮੁੱਖ ਮੰਤਰੀ ਪੰਜਾਬ ਸ. ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਵਾਲੀ ਸੂਬਾ ਸਰਕਾਰ ਦੇ ਪੈਰਾਂ ਨੂੰ ਫ਼ਸਲਾਂ, ਘਰਾਂ, ਪਸੂਆਂ, ਵਿਅਕਤੀਆਂ ਤੇ ਬੁਨਿਆਦੀ ਢਾਂਚੇ ਦਾ ਢੁਕਵਾਂ ਮੁਆਵਜ਼ਾ ਦੇਣ ਲਈ ਜ਼ੰਜੀਰਾਂ ‘ਚ ਜਕੜਦੇ ਹਨ। ਜਦੋਂਕਿ ਆਫਤਾਂ ਲਈ ਮੁਆਵਜ਼ਾ ਦੇਣ ਹਿੱਤ ਐਸਡੀਆਰਐਫ ਦੇ ਨਿਯਮ ਲੋਕ ਹਿੱਤਾਂ ਨੂੰ ਮੁੱਖ ਰੱਖਦੇ ਹੋਏ ਲਚਕਦਾਰ ਹੋਣੇ ਚਾਹੀਦੇ ਹਨ।
ਉਨ੍ਹਾਂ ਦੱਸਿਆ ਕਿ ਐਸਡੀਆਰਐਫ ‘ਚ ਨਿਯਮਾਂ ਅਨੁਸਾਰ ਬਕਾਇਦਾ ਕੇਂਦਰੀ ਵਿੱਤ ਕਮਿਸ਼ਨ ਵੱਲੋਂ ਸੂਬਾ ਸਰਕਾਰ ਨੂੰ ਫੰਡ ਭੇਜੇ ਜਾਂਦੇ ਹਨ, ਜਿਸ ‘ਚ 25 ਫ਼ੀਸਦ ਹਿੱਸਾ ਸੂਬਾ ਸਰਕਾਰ ਵੀ ਪਾਉਂਦੀ ਹੈ, ਬੀਤੇ ਮੰਗਲਵਾਰ ਪੰਜਾਬ ਦੇ ਵਿੱਤ ਮੰਤਰੀ ਐਡਵੋਕੇਟ ਹਰਪਾਲ ਸਿੰਘ ਚੀਮਾ ਦੀ ਅਗਵਾਈ ਹੇਠਲੇ ਵਫਦ ਨੇ ਨਵੀਂ ਦਿੱਲੀ ਵਿਖੇ 16 ਵੇਂ ਵਿੱਤ ਕਮਿਸ਼ਨ ਦੇ ਚੇਅਰਮੈਨ ਡਾ. ਅਰਵਿੰਦ ਪੰਨਗੜੀਆ ਨਾਲ ਉਚੇਚੀ ਮੁਲਾਕਾਤ ਕਰਕੇ ਇਸ ਸਮੇਂ ਪੰਜਾਬ ਕੋਲ ਐਸਡੀਆਰਐਫ ਦੇ ਕੁੱਲ ਫੰਡ 12,268 ਕਰੋੜ ਰੁਪਏ ਫੰਡ ਹੋਣ ਦੇ ਲੇਖਾ ਜੋਖਾ ਦਿੰਦਿਆ ਦੱਸਿਆ ਕਿ ਪੰਜਾਬ ‘ਚ ਵਿਰੋਧੀ ਧਿਰਾਂ ਸਮੇਤ ਕੇਂਦਰੀ ਵਜੀਰਾਂ ਤੇ ਸੀਨੀਅਰ ਭਾਜਪਾ ਲੀਡਰਸ਼ਿਪ ਵੱਲੋਂ ਪੈਂਦਾ ਕੀਤੇ ਗਏ ਵਾਦ ਵਿਵਾਦ ਬੇਲੋੜਾ ਹੈ, ਕਿਉਂਕਿ ਪੰਜਾਬ ਵੱਲ ਖੜੀ ਉਕਤ ਰਕਮ ‘ਚ 7623 ਕਰੋੜ ਰੁਪਏ ਵਿਆਜ਼ ਦੀ ਵੱਡੀ ਰਕਮ ਹੈ। ਸ. ਧਾਲੀਵਾਲ ਨੇ ਕਿਹਾ ਕਿ ਐਸਡੀਆਰਐਫ ਨੂੰ ਵੀ ਰਾਸ਼ਟਰੀ ਆਫਤ ਪ੍ਰਬੰਧਨ ਫੰਡ (ਐਨਡੀਆਰਐਫ )ਵਾਂਗ ਇੱਕ ਬਿਨ੍ਹਾਂ ਵਿਆਜ਼ ਰਿਜਰਵ ਫੰਡ ‘ਚ ਬਦਲਣ ਦੀ ਮੁੱਖ ਲੋੜ ਹੈ। ਸ. ਧਾਲੀਵਾਲ ਨੇ ਦਾਅਵਾ ਕੀਤਾ ਕਿ ਕੇਂਦਰੀ ਸਰਕਾਰ ਦੇ ਮਤਰੇਈ ਮਾਂ ਵਾਲੇ ਸਲੂਕ ਦੇ ਬਾਵਜ਼ੂਦ ਹੜ੍ਹ ਪੀੜਤਾਂ ਦੇ ਪੁਨਰਵਸੇਬੇ ਅਤੇ ਉੱਚਿਤ ਮੁਆਵਜ਼ਾ ਦੇਣ ‘ਚ ਆਪਨੇ ਸਰੋਤਾਂ ‘ਚੋਂ ਫੰਡ ਜਾਰੀ ਕਰਕੇ ਪੰਜਾਬ ਰੰਗਲਾ ਪੰਜਾਬ ਬਣਾਏਗੀ।
ਇਸ ਮੌਕੇ ਤੇ ਸੀਨੀਅਰ ਆਗੂ ਖੁਸ਼ਪਾਲ ਸਿੰਘ ਧਾਲੀਵਾਲ, ਵਿਸ਼ਵ ਪੰਜਾਬੀ ਸਭਾ ਕੈਨੇਡਾ ਦੇ ਪ੍ਰਧਾਨ ਡਾ.ਦਲਬੀਰ ਸਿੰਘ ਕਥੂਰੀਆ, ਮਾਂਝਾ ਜ਼ੋਨ ਦੇ ਪ੍ਰਧਾਨ ਤੇ ਲੇਖਕ ਸ. ਸਤਬੀਰ ਸਿੰਘ ਅੰਮ੍ਰਿਤਸਰ, ਸਭਾ ਦੇ ਕੌਮਾਂਤਰੀ ਮੀਡੀਆ ਸਲਾਹਕਾਰ ਜਸਵਿੰਦਰ ਸਿੰਘ ਬਿੱਟਾ, ਪੀਏ ਮੁਖ਼ਤਾਰ ਸਿੰਘ ਬੱਲੜਵਾਲ ਸਮੇਤ ਹੋਰ ਪਤਵੰਤੇ ਸੱਜਣ ਮੌਜ਼ੂਦ ਸਨ।
Leave a Reply