EPFO ਖੇਤਰੀ ਦਫ਼ਤਰ, ਚੰਡੀਗੜ੍ਹ ਵੱਲੋਂ ਮੋਹਾਲੀ ਇੰਡਸਟਰੀਅਲ ਐਸੋਸੀਏਸ਼ਨ ਵਿਖੇ AMNESTY, VISHWAS, EEC 2026 ਅਤੇ PM-VBRY ਸਕੀਮਾਂ ‘ਤੇ ਜਾਗਰੂਕਤਾ ਸੈਮੀਨਾਰ ਦਾ ਆਯੋਜਨ
ਚੰਡੀਗੜ੍ਹ/ਮੋਹਾਲੀ
,( ਜਸਟਿਸ ਨਿਊਜ਼ )
ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ (EPFO) ਦੇ ਖੇਤਰੀ ਦਫ਼ਤਰ, ਚੰਡੀਗੜ੍ਹ ਨੇ ਅੱਜ ਮੋਹਾਲੀ ਇੰਡਸਟਰੀਅਲ ਐਸੋਸੀਏਸ਼ਨ (MIA), ਮੋਹਾਲੀ ਵਿਖੇ ਸ਼੍ਰੀ ਅਸ਼ੋਕ ਗੁਪਤਾ, ਪ੍ਰਧਾਨ; ਸ਼੍ਰੀ ਰਾਕੇਸ਼ ਵਿੱਗ, ਜਨਰਲ ਸਕੱਤਰ; ਅਤੇ ਸ਼੍ਰੀ ਜਸਬੀਰ ਸਿੰਘ, ਚੇਅਰਮੈਨ ਸਮੇਤ ਐਸੋਸੀਏਸ਼ਨ ਦੇ ਨੁਮਾਇੰਦਿਆਂ ਅਤੇ ਅਹੁਦੇਦਾਰਾਂ ਦੇ ਸਹਿਯੋਗ ਨਾਲ ਇੱਕ ਜਾਗਰੂਕਤਾ ਸੈਮੀਨਾਰ ਦਾ ਆਯੋਜਨ ਕੀਤਾ। ਇਸ ਸੈਮੀਨਾਰ ਦਾ ਉਦੇਸ਼ ਐਮਨੈਸਟੀ ਸਕੀਮ, 2026, ਵਿਸ਼ਵਾਸ ਸਕੀਮ, 2026, ਕਰਮਚਾਰੀ ਨਾਮਜ਼ਦਗੀ ਮੁਹਿੰਮ (EEC), 2026 ਅਤੇ ਪ੍ਰਧਾਨ ਮੰਤਰੀ ਵਿਕਸਿਤ ਭਾਰਤ ਰੋਜ਼ਗਾਰ ਯੋਜਨਾ (PM-VBRY) ਬਾਰੇ ਜਾਣਕਾਰੀ ਦਾ ਪ੍ਰਸਾਰ ਕਰਨਾ ਅਤੇ ਵਿਆਪਕ ਜਾਗਰੂਕਤਾ ਪੈਦਾ ਕਰਨਾ ਸੀ।
ਇਸ ਸੈਮੀਨਾਰ ਦੀ ਪ੍ਰਧਾਨਗੀ ਡਾ. ਕੇ.ਪੀ. ਸਿੰਘ, ਖੇਤਰੀ ਭਵਿੱਖ ਨਿਧੀ ਕਮਿਸ਼ਨਰ-I ਅਤੇ ਇੰਚਾਰਜ ਅਧਿਕਾਰੀ, ਖੇਤਰੀ ਦਫ਼ਤਰ, ਚੰਡੀਗੜ੍ਹ ਨੇ ਕੀਤੀ। ਇਸ ਮੌਕੇ ਸ਼੍ਰੀ ਨੀਰਜ ਸ਼੍ਰੀਵਾਸਤਵ, ਖੇਤਰੀ ਭਵਿੱਖ ਨਿਧੀ ਕਮਿਸ਼ਨਰ-I, ਜ਼ੋਨਲ ਦਫ਼ਤਰ, ਪੰਜਾਬ ਅਤੇ ਹਿਮਾਚਲ ਪ੍ਰਦੇਸ਼ ਵੀ ਹਾਜ਼ਰ ਰਹੇ।
ਸੈਮੀਨਾਰ ਦੌਰਾਨ, ਸੰਗਠਨ ਦੇ ਅਧਿਕਾਰੀਆਂ ਨੇ ਸਬੰਧਤ ਕਾਨੂੰਨੀ ਉਪਬੰਧਾਂ, ਹਰੇਕ ਸਕੀਮ ਅਧੀਨ ਉਪਲਬਧ ਲਾਭਾਂ ਅਤੇ ਇਸ ਨਾਲ ਜੁੜੇ ਪ੍ਰਕਿਰਿਆਤਮਕ ਪਹਿਲੂਆਂ ਦੀ ਵਿਸਤ੍ਰਿਤ ਜਾਣਕਾਰੀ ਦਿੱਤੀ, ਤਾਂ ਜੋ ਹਿੱਸੇਦਾਰ ਇਨ੍ਹਾਂ ਸਕੀਮਾਂ ਦਾ ਲਾਭ ਸਪੱਸ਼ਟਤਾ ਅਤੇ ਆਸਾਨੀ ਨਾਲ ਲੈ ਸਕਣ।
ਇਸ ਪ੍ਰੋਗਰਾਮ ਵਿੱਚ ਹੋਰਨਾਂ ਦੇ ਨਾਲ-ਨਾਲ, ਛੋਟ ਪ੍ਰਾਪਤ ਅਦਾਰਿਆਂ ਜਿਵੇਂ ਹਿੰਦੁਸਤਾਨ ਯੂਨੀਲੀਵਰ ਲਿਮਟਿਡ, ਪੀ.ਆਰ.ਟੀ.ਸੀ. (PRTC), ਡੀ.ਏ.ਵੀ. (DAV) ਆਦਿ ਦੇ ਨੁਮਾਇੰਦਿਆਂ; ਮੋਹਾਲੀ, ਡੇਰਾਬੱਸੀ, ਲਾਲੜੂ ਅਤੇ ਪਟਿਆਲਾ ਦੇ ਵੱਖ-ਵੱਖ ਅਦਾਰਿਆਂ ਜਿਵੇਂ ਟੈਲੀਪਰਫਾਰਮੈਂਸ ਮੋਹਾਲੀ, ਟੀ.ਡੀ.ਐੱਸ. ਮੈਨੇਜਮੈਂਟ ਮੋਹਾਲੀ, ਨਾਹਰ ਇੰਡਸਟਰੀਜ਼ ਆਦਿ ਦੇ ਨੁਮਾਇੰਦਿਆਂ; ਅਤੇ ਮਾਲਕ ਐਸੋਸੀਏਸ਼ਨਾਂ ਜਿਵੇਂ ਡੇਰਾਬੱਸੀ ਇੰਡਸਟਰੀਅਲ ਐਸੋਸੀਏਸ਼ਨ (ਜਿਸਦੀ ਨੁਮਾਇੰਦਗੀ ਸ਼੍ਰੀ ਗੁਰਜੰਟ ਸਿੰਘ ਨੇ ਕੀਤੀ) ਅਤੇ ਲਾਲੜੂ ਇੰਡਸਟਰੀਅਲ ਐਸੋਸੀਏਸ਼ਨ ਦੇ ਨੁਮਾਇੰਦਿਆਂ ਦੇ ਨਾਲ-ਨਾਲ ਹੋਰ ਸਬੰਧਤ ਵਿਅਕਤੀਆਂ ਅਤੇ ਹਿੱਸੇਦਾਰਾਂ ਨੇ ਵੀ ਹਿੱਸਾ ਲਿਆ। ਪ੍ਰੋਗਰਾਮ ਵਿੱਚ ਮੌਜੂਦ ਸਾਰੇ ਲੋਕਾਂ ਨੇ ਇਨ੍ਹਾਂ ਸਕੀਮਾਂ ਨੂੰ ਸ਼ੁਰੂ ਕਰਨ ਦੀ ਸਰਕਾਰ ਦੀ ਪਹਿਲਕਦਮੀ ਦੀ ਸ਼ਲਾਘਾ ਕੀਤੀ।
ਵਿਚਾਰੀਆਂ ਗਈਆਂ ਸਕੀਮਾਂ ਦੀਆਂ ਮੁੱਖ ਵਿਸ਼ੇਸ਼ਤਾਵਾਂ
1. ਐਮਨੈਸਟੀ, 2026
ਇਹ ਸਕੀਮ ਉਨ੍ਹਾਂ ਭਵਿੱਖ ਨਿਧੀ ਟਰੱਸਟਾਂ (Provident Fund Trusts) ਦੀ ਛੋਟ-ਸਥਿਤੀ (exemption status) ਨੂੰ ਨਿਯਮਿਤ ਕਰਨ ਦਾ ਮੌਕਾ ਪ੍ਰਦਾਨ ਕਰਦੀ ਹੈ, ਜੋ ਆਮਦਨ ਕਰ ਐਕਟ, 1961 (1961 ਦਾ 43) ਅਧੀਨ ਮਾਨਤਾ ਪ੍ਰਾਪਤ ਤਾਂ ਹਨ, ਪਰ ਕਰਮਚਾਰੀ ਭਵਿੱਖ ਨਿਧੀ ਅਤੇ ਫੁਟਕਲ ਉਪਬੰਧ ਐਕਟ, 1952 / ਸਮਾਜਿਕ ਸੁਰੱਖਿਆ ਕੋਡ, 2020 ਅਧੀਨ ਉਨ੍ਹਾਂ ਨੂੰ ਰਸਮੀ ਛੋਟ ਪ੍ਰਾਪਤ ਨਹੀਂ ਹੋਈ ਹੈ।
2. ਵਿਸ਼ਵਾਸ, 2026
ਇਹ ਸਕੀਮ ਅਦਾਰਿਆਂ ਨੂੰ ਕਰਮਚਾਰੀ ਭਵਿੱਖ ਨਿਧੀ ਅਤੇ ਫੁਟਕਲ ਉਪਬੰਧ ਐਕਟ, 1952 ਦੀ ਧਾਰਾ 14ਬੀ ਅਤੇ/ਜਾਂ ਸਮਾਜਿਕ ਸੁਰੱਖਿਆ ਕੋਡ, 2020 ਦੀ ਧਾਰਾ 128 ਅਧੀਨ ਹਰਜਾਨੇ (damages) ਨਾਲ ਸਬੰਧਤ ਵਿਵਾਦਾਂ ਦੇ ਸੁਹਿਰਦ, ਇਕਮੁਸ਼ਤ ਨਿਪਟਾਰੇ ਦਾ ਮੌਕਾ ਪ੍ਰਦਾਨ ਕਰਦੀ ਹੈ। ਇਸ ਇਕਮੁਸ਼ਤ ਨਿਪਟਾਰੇ ਰਾਹੀਂ ਅਦਾਰਿਆਂ ਨੂੰ ਹਰਜਾਨੇ/ਜੁਰਮਾਨੇ ਵਿੱਚ ਕਟੌਤੀ ਦਾ ਲਾਭ ਪ੍ਰਾਪਤ ਹੋਵੇਗਾ।
3. ਕਰਮਚਾਰੀ ਨਾਮਜ਼ਦਗੀ ਮੁਹਿੰਮ (EEC), 2026
ਇਸ ਮੁਹਿੰਮ ਅਧੀਨ ਮਾਲਕ ਉਨ੍ਹਾਂ ਕਰਮਚਾਰੀਆਂ ਨੂੰ ਨਾਮਜ਼ਦ ਕਰ ਸਕਣਗੇ ਜੋ ਵਰਤਮਾਨ ਵਿੱਚ EPF ਦੇ ਦਾਇਰੇ ਵਿੱਚ ਨਹੀਂ ਆਉਂਦੇ, ਜਿਸ ਨਾਲ ਵਿਆਪਕ ਕਾਰਜਬਲ ਤੱਕ ਸਮਾਜਿਕ ਸੁਰੱਖਿਆ ਕਵਰੇਜ ਦਾ ਵਿਸਥਾਰ ਹੋਵੇਗਾ।
EPF ਸਕੀਮ ਅਧੀਨ ਪਹਿਲਾਂ ਤੋਂ ਸ਼ਾਮਲ ਜਾਂ ਸ਼ਾਮਲ ਹੋਣ ਦੇ ਯੋਗ ਸਾਰੇ ਅਦਾਰਿਆਂ ਦੇ ਮਾਲਕ, ਇੰਪਲਾਇਰ ਪੋਰਟਲ ਰਾਹੀਂ ਅਜਿਹੇ ਛੁੱਟ ਗਏ ਕਰਮਚਾਰੀਆਂ ਦੀ ਜਾਣਕਾਰੀ ਦੇ ਸਕਦੇ ਹਨ ਜੋ 1 ਅਪ੍ਰੈਲ 2009 ਤੋਂ 31 ਮਾਰਚ 2026 ਦਰਮਿਆਨ ਉਨ੍ਹਾਂ ਦੇ ਅਦਾਰੇ ਵਿੱਚ ਸ਼ਾਮਲ ਹੋਏ ਸਨ।
4. ਪ੍ਰਧਾਨ ਮੰਤਰੀ ਵਿਕਸਿਤ ਭਾਰਤ ਰੋਜ਼ਗਾਰ ਯੋਜਨਾ (PM-VBRY)
ਇਸ ਯੋਜਨਾ ਅਧੀਨ ਨਵੇਂ ਕਰਮਚਾਰੀਆਂ ਅਤੇ ਉਨ੍ਹਾਂ ਦੇ ਮਾਲਕਾਂ ਦੋਵਾਂ ਨੂੰ ਲਾਭ ਪ੍ਰਾਪਤ ਹੋਵੇਗਾ — ਕਰਮਚਾਰੀਆਂ ਨੂੰ ਸਿੱਧਾ ਵਿੱਤੀ ਲਾਭ ਮਿਲੇਗਾ, ਜਦਕਿ ਮਾਲਕਾਂ ਨੂੰ ਨਵੇਂ ਰੋਜ਼ਗਾਰ ਸਿਰਜਣ ਲਈ ਉਤਸ਼ਾਹ ਮਿਲੇਗਾ।
ਖੇਤਰੀ ਦਫ਼ਤਰ ਦੇ ਅਧਿਕਾਰੀਆਂ ਨੇ ਸਾਰੇ ਹਿੱਸੇਦਾਰਾਂ ਨੂੰ ਨਿਰਧਾਰਤ ਸਮਾਂ-ਸੀਮਾ ਦੇ ਅੰਦਰ ਇਨ੍ਹਾਂ ਸਕੀਮਾਂ ਦਾ ਲਾਭ ਲੈਣ ਵਿੱਚ ਨਿਰੰਤਰ ਸਹਿਯੋਗ ਅਤੇ ਮਾਰਗਦਰਸ਼ਨ ਦਾ ਭਰੋਸਾ ਦਿੱਤਾ।
