ਰਾਵੀ ਦਰਿਆ ਦੀ ਪਈ ਹੜ੍ਹਾਂ ਦੀ ਮਾਰ ਲਈ ਡਿਊਟੀ ‘ਚ ਕੋਤਾਹੀ ਕਾਰਨ ਗੁਰਦਾਸਪੁਰ ਦੇ ਐਕਸੀਐਨ, ਐਸਡੀਓ ਤੇ ਜੇਈ ਕੀਤੇ ਮੁਅੱਤਲ- ਧਾਲੀਵਾਲ

ਰਣਜੀਤ ਸਿੰਘ ਮਸੌਣ

ਜੋਗਾ ਸਿੰਘ ਰਾਜਪੂਤ

ਅੰਮ੍ਰਿਤਸਰ////////////ਅੱਜ ਹੜ੍ਹਾਂ ਦੀ ਮਾਰ ‘ਚ ਬੁਰੀ ਤਰ੍ਹਾਂ ਝੰਭੇ ਤੇ ਬੁਰੀ ਤਰਾਂ ਗਾਰ ਤੇ ਹੋਰ ਕਚਰੇ ‘ਚ ਦੱਬੇ ਇਤਿਹਾਸਕ ਨਗਰ ਰਮਦਾਸ ਦੇ ਸਬ ਤਹਿਸੀਲ ਕੇਂਦਰ ਅਤੇ ਮੁੱਢਲਾ ਸਿਹਤ ਕੇਂਦਰ (ਸਿਵਲ ਹਸਪਤਾਲ) ਰਮਦਾਸ ਨੂੰ ਮੁੜ ਸਰਕਾਰੀ ਸੇਵਾਵਾਂ ਦੇਣ ਲਈ ਪੈਰਾਂ ਸਿਰ ਖੜਾ ਕਰਨ ਹਿੱਤ ਹਲਕਾ ਵਿਧਾਇਕ ਤੇ ਸਾਬਕਾ ਕੈਬਨਿਟ ਮੰਤਰੀ ਪੰਜਾਬ ਸ: ਕੁਲਦੀਪ ਸਿੰਘ ਧਾਲੀਵਾਲ ਨੇ ਖੁੱਦ ਇਨ੍ਹਾਂ ਸਰਕਾਰੀ ਸੰਸਥਾਵਾਂ ‘ਚੋਂ ਗਾਰ ਕੱਢ ਕੇ ਸਾਫ਼ ਸਫ਼ਾਈ ਕਰਨ ਸਮੇਤ ਕਸਬਾ ਰਮਦਾਸ ‘ਚ ਮੱਛਰ ਮਾਰ ਦਵਾਈ ਦੀ ਫੌਗਿੰਗ ਕਰਵਾਈ। ਰਮਦਾਸ ਦੇ ਸ਼ਹਿਰੀ ਵਸਨੀਕਾਂ ਸਮੇਤ ਆਲੇ ਦੁਆਲੇ ਦੇ ਪ੍ਰਭਾਵਿਤ ਪਿੰਡਾਂ ਦੇ ਹੜ੍ਹ ਪੀੜਤਾਂ ਦੀਆਂ ਸਮੱਸਿਆਵਾਂ ਸੁਣਦਿਆਂ ਸ. ਧਾਲੀਵਾਲ ਨੇ ਸਪੱਸ਼ਟ ਕੀਤਾ ਕਿ ਅਜਨਾਲਾ ਤਹਿਸੀਲ ਸਮੇਤ ਜ਼ਿਲਾ ਗੁਰਦਾਸਪੁਰ ਦੇ ਪਿੰਡਾਂ, ਸ਼ਹਿਰਾਂ , ਕਸਬਿਆਂ ਨੂੰ ਰਾਵੀ ਦਰਿਆ ਦੇ ਹੜ੍ਹਾਂ ਦੀ ਮਾਰ ਭੁਗਤਨੀ ਪਈ ਹੈ। ਹੜ੍ਹਾਂ ਦੇ ਕਾਰਨਾਂ ਦੀ ਜਾਂਚ ਕਰਵਾਉਣ ਅਤੇ ਹੜ੍ਹਾਂ ਦੀ ਸਥਿਤੀ ਲਈ ਜ਼ਿੰਮੇਵਾਰ ਪਾਏ ਜਾਣ ਵਾਲੇ ਅਧਿਕਾਰੀਆਂ ਤੇ  ਕਰਮਚਾਰੀਆਂ ਖਿਲਾਫ਼ ਅਨੁਸ਼ਾਸ਼ਨੀ ਕਾਰਵਾਈ ਕਰਨ ਲਈ ਮੁੱਖ ਮੰਤਰੀ ਪੰਜਾਬ ਸ. ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਵਾਲੀ ਸਰਕਾਰ ਨੇ ਉਚਿੱਤ ਕਦਮ ਚੁੱਕ ਲਏ ਹਨ ਅਤੇ ਰਾਵੀ ਦਰਿਆ ‘ਚ ਕੁਦਰਤੀਂ ਕਰੋਪੀ ਤੋਂ ਇਲਾਵਾ ਹੜ੍ਹਾਂ ਦੀ ਜਾਂਚ ਦੇ ਮੁਢਲੇ ਪੜਾਅ ‘ਚ ਪੰਜਾਬ ਸਰਕਾਰ ਨੇ ਵੱਡਾ ਐਕਸ਼ਨ ਲੈਂਦਿਆਂ ਮਾਧੋਪੁਰ ਹੈਡਵਰਕਸ ਤੋਂ ਰਾਵੀ ਦਰਿਆ ਦੇ ਪਾਣੀ ਛੱਡਣ ਮੌਕੇ ਗੇਟ ਟੁੱਟਣ ਦੇ ਕਥਿਤ ਇਲਜ਼ਾਮ ‘ਚ ਜ਼ਿੰਮੇਵਾਰ ਠਹਿਰਾਏ ਜਾ ਰਹੇ ਐਕਸੀਐਨ ਨਿਤਿਨ ਸੂਦ, ਐਸਡੀਓ ਅਰੁਣ ਕੁਮਾਰ ਤੇ ਜੇਈ ਸਚਿਨ ਕੁਮਾਰ ਨੂੰ ਫੌਰੀ ਪ੍ਰਭਾਵ ਨਾਲ ਮੁਅੱਤਲ ਕਰ ਦਿੱਤਾ ਹੈ।

ਉਨ੍ਹਾਂ ਕਿਹਾ ਕਿ ਚਿੰਤਾ ਇਸ ਗੱਲ ਦੀ ਵੀ ਹੈ ਕਿ ਮਾਨ ਸਰਕਾਰ ਵੱਲੋਂ ਭਾਖੜਾ ਡੈਮ ਤੋਂ ਜੂਨ ਮਹੀਨੇ ‘ਚ ਨਹਿਰਾਂ ‘ਚ ਪਾਣੀ ਛੱਡਣ ਤੋਂ ਇਨਕਾਰੀ ਹੁੰਦਿਆਂ ਕਥਿਤ ਜਿੱਦੀ ਰਵੱਈਏ ਕਾਰਨ ਪਹਾੜਾਂ ਤੋਂ ਬੱਦਲ ਫੱਟਣ ਕਾਰਣ ਡੈਮ ‘ਚ ਖ਼ਤਰੇ ਦੇ ਨਿਸ਼ਾਨ ਤੱਕ ਇਕੱਠੇ ਹੋਏ ਪਾਣੀ ਨੂੰ ਭਾਖੜਾ ਡੈਮ ਬੋਰਡ ਮੈਨਜਮੈਂਟ ਦੇ ਚੇਅਰਮੈਨ ਵੱਲੋਂ ਛੱਡੇ ਜਾਣ ਕਾਰਨ ਬਿਆਸ ‘ਚ ਆਏ ਭਿਅੰਕਰ ਹੜਾਂ ਨੇ ਜਾਨੀ ਮਾਲੀ ਨੁਕਸਾਨ ਦੀ ਭਾਰੀ ਤਬਾਹੀ ਮਚਾਈ, ਪਰ ਬੀਬੀਐਮਬੀ ਤੇ ਕੇਂਦਰ ਸਰਕਾਰ ਦਾ ਕੰਟਰੋਲ ਹੋਣ ਕਾਰਣ ਸਿੱਧੇ ਤੇ ਅਸਿੱਧੇ ਰੂਪ ‘ਚ ਜ਼ਿੰਮੇਵਾਰ ਠਹਿਰਾਏ ਜਾ ਰਹੇ ਬੀਬੀਐਮਬੀ ਦੇ ਅਧਿਕਾਰੀਆਂ ਵਿਰੁੱਧ ਨਾ ਤਾਂ ਕੋਈ ਅਨੁਸ਼ਾਸ਼ਨੀ ਕਾਰਵਾਈ ਕੀਤੀ ਜਾ ਰਹੀ ਹੈ ਤੇ ਨਾ ਹੀ ਇਸਦਾ ਪ੍ਰਬੰਧ ਪੰਜਾਬ ਸਰਕਾਰ ਨੂੰ ਦਿੱਤਾ ਜਾ ਰਿਹਾ ਹੈ, ਜੋ ਸਰਾਸਰ ਤਾਨਾਸ਼ਾਹੀ ਹੈ। ਸ. ਧਾਲੀਵਾਲ ਨੇ ਕਿਹਾ ਕਿ ਸਬ ਤਹਿਸੀਲ ਰਮਦਾਸ, ਤਹਿਸੀਲ ਅਜਨਾਲਾ ਸਮੇਤ ਪੰਜਾਬ ਦੇ ਹੋਰ ਹੜ੍ਹ ਪ੍ਰਭਾਵਿਤ ਤਹਿਸੀਲਾਂ ‘ਚ ਹੁਣ ਈਜੀ ਰਜਿਸਟਰੀ ਕਰਨ ਤੇ ਕਰਵਾਉਣ ਦੀ ਪ੍ਰਕਿਰਿਆ ਬਕਾਇਦਾ ਸ਼ੁਰੂ ਕੀਤੀ ਗਈ ਹੈ। ਉਨ੍ਹਾਂ ਇਹ ਵੀ ਦੱਸਿਆ ਕਿ 76 ਫ਼ੀਸਦੀ ਤੋਂ ਵੱਧ ਨੁਕਸਾਨੀਆਂ ਗਈਆਂ ਫ਼ਸਲਾਂ ਦੇ ਮੁਆਵਜ਼ੇ ਲਈ 7 ਦਿਨਾਂ ‘ਚ ਗਿਰਦਾਵਰੀ ਕਰਨ ਦੀ ਪ੍ਰਕਿਰਿਆ ਅੱਜ ਮੁਕੰਮਲ ਹੋ ਗਈ ਹੈ ਅਤੇ ਅਗਲੇ 7 ਦਿਨਾਂ ‘ਚ 76 ਫ਼ੀਸਦ ਤੋਂ ਹੇਠਲੇ ਨੁਕਸਾਨ ਵਾਲੀਆਂ ਫ਼ਸਲਾਂ ਦੇ ਖ਼ਰਾਬੇ ਦੀ ਗਿਰਦਾਵਰੀ ਮੁਕੰਮਲ ਹੋਣ ਪਿੱਛੋਂ ਕਾਨੂੰਨਗੋ, ਤਹਿਸੀਲਦਾਰਾਂ, ਨਾਇਬ ਤਹਿਸੀਲਦਾਰਾਂ, ਐਸਡੀਐਮ ਤੇ ਜ਼ਿਲਾ ਡਿਪਟੀ ਕਮਿਸ਼ਨਰ ਵੱਲੋਂ ਗਿਰਦਾਵਰੀ ਰਿਪੋਰਟਾਂ ਦੇ ਸਹੀ ਹੋਣ ਦੀ ਸੂਰਤ ‘ਚ ਮੋਹਰ ਲਗਾਏ ਜਾਣ ਤੇ ਦੀਵਾਲੀ ਤੋਂ ਪਹਿਲਾਂ ਪਹਿਲਾਂ ਪ੍ਰਭਾਵਿਤ ਕਿਸਾਨਾਂ ਦੇ ਹੱਥਾਂ ‘ਚ ਮੁਆਵਜ਼ੇ ਦੇ ਚੈੱਕਾਂ ਸਮੇਤ ਨੁਕਸਾਨੇ ਘਰਾਂ ਤੇ ਹੜਾਂ ‘ਚ ਮਰੇ ਪਸ਼ੂਆਂ ਆਦਿ ਦਾ ਮੁਆਵਜ਼ਾ ਵੀ ਦਿੱਤਾ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਹੜ੍ਹ ਪ੍ਰਭਾਵਿਤ ਹਲਕਾ ਅਜਨਾਲਾ ਤਹਿਤ ਪੈਂਦੇ ਆਮ ਆਦਮੀ ਪਾਰਟੀ ਕਲੀਨਿਕਾਂ ਸਮੇਤ ਸਿਵਲ ਡਿਸਪੈਂਸਰੀਆਂ, ਮੁੱਢਲੇ ਸਿਹਤ ਕੇਂਦਰਾਂ ਤੇ ਸਿਵਲ ਹਸਪਤਾਲਾਂ ਨੂੰ ਸਿਹਤ ਸੁਰੱਖਿਆ ਸੇਵਾਵਾਂ ਦੇਣ ਲਈ ਪੈਰਾਂ ਸਿਰ ਖੜਾ ਕਰ ਦਿੱਤਾ ਗਿਆ ਹੈ ਅਤੇ ਹਰ ਪ੍ਰਭਾਵਿਤ ਪਿੰਡ ‘ਚ ਫੌਗਿੰਗ ਕਰਵਾਈ ਕਾ ਰਹੀ ਹੈ।

ਇਸ ਮੌਕੇ ਤੇ ਖੁਸ਼ਪਾਲ ਸਿੰਘ ਧਾਲੀਵਾਲ, ਪੀਏ ਮੁੱਖਤਾਰ ਸਿੰਘ ਬੱਲੜਵਾਲ, ਦਫ਼ਤਰ ਸਕੱਤਰ ਗੁਰਜੰਟ ਸਿੰਘ ਸੋਹੀ, ਚੇਅਰਮੈਨ ਬਲਦੇਵ ਸਿੰਘ ਬੱਬੂ ਚੇਤਨਪੁਰਾ, ਸ਼ਹਿਰੀ ਪ੍ਰਧਾਨ ਹਰਪਾਲ ਸਿੰਘ ਆਦਿ ਮੌਜ਼ੂਦ ਸਨ।